بازگشت
قوماندان شورا ته ځې
راستونکي : سمسور راستونکي : سمسور

 

 

ووې قومندان  :  مجاهدينوماته وګورئ ! 

روی دپاک رسول ، دمدېني مولاته وګورئ

کفر وطن لاندي کړ ، ليږ دي  بلاته وګورئ

باب ولسمشري شوه، دي ساري ته وګورئ

ماته رأېه  راکړئ که له کفره خلاصيده غواړئ

نورله مانه څه غواړئ ؟

 

سم سوتره ځان پوه کړئ دغازيانو زه کانديد يمه

بر دجګړه مارو پاټکيانو زه کاندېد يمه

لر د " آ اس آ " د پنجابيا نو زه کانديد يمه    

بل دځان وژونکو  عربانو زه کانديد يمه 

ماته  رأيه راکړئ که ددين لپاره ښه غواړئ

نور له مانه څه غواړئ  ؟

 

زه ستاسي د سيمي قمندان ، دتاسي پلاريمه 

زه د يرغلګرو جهاديانو يو سردار يمه  

زه دسخت دريځو مشرانو افتخار يمه

ماته راتسليم شئ ، زه ريښتني ټوپکمار يمه 

ووايی بد مخو نور زما په شان کي څه غواړئ

چيرې تر ما ښه غواړئ ؟

 

مونږ په پارلمان کې يوه تګ لاره جهادی غواړو

موږه   د اپينو د  کرلو آزادي  غواړو 

مونږ د جګړه مارو ټوپکيانو آبادي غواړو

مونږه د ملګرو ملتونو  بربادي  غواړو

نور په دي مرام کې تردې پورته  څه خواږه غواړئ 

نور له مانه څه  غواړئ ؟

 

زه چې قمندان يم هم حاجي ، حاجي وکيل به شم

نوم مې خلل خان دی ، نوم به واړوم خليل به شم 

کله چې وکيل شم ، که خرګوټی يمه پيل به شم 

اوس که تش کدو يم ، مرچکي او زنجپيل به شم 

سره پونډ به درکمه ، که تاسي له ما سره غواړئ

نور له مانه څه غواړئ ؟

 

زه که رأيه يوسم  جمهوري  په جمهوري وهم

واک به زما خپل وي خو نارې به د وروري وهم 

ساز به پخوانی وی  خو نغمه به يې عصري وهم 

پټه غلا  به پريږدم  خزانه به حضوري  وهم

تاسي چې زما د دبدبې پراخيده غواړئ

نور له مانه  څه غواړئ ؟

 

زه که رأيه يوسمه ، جهاد به رويکار کمه

بېا به تاسي ګرده خاوندان  د اقتدار کمه 

بېرته به رواج د قاچاقونو کاروبار کمه 

نوي هيروئين  به  بازارونو ته تيار کمه 

اې خانه خرابو له وکيل څخه نور څه غواړئ 

بد غواړئ ، که ښه غواړئ ؟

 

زه که رأيه يوسم ، ستاسي ستونځي به آساني شي 

بل جهاد به پيل شي  خبرې به روانې شي

بيابه د ترياکو روپۍ بيرته  پريمانه شي 

ستاسي کنډوالې او ورانې خونې به ودانې شي

ټينګ شئ دغه کارته که پنځه واره واده غواړئ 

نور له مانه څه غواړئ ؟

 

ما شورا ته واستوئ  چې خلاص مو له خواري کمه 

زه به سرکاري شم تاسي ټول به سرکاري کمه

څوک دي هستي نه نګيري چې بيا به خرکاري کمه

يا به د جومات د غلا په توکو جواري کمه

دغه کار ته ټينګ شئ ، که د نس ماړه کيده غواړئ

نور له ما نه څه غواړئ ؟

ښځې درنه لاړې له يوې مخې سرکاري شولې

کورنه لاس په سر شوې ، ديونو کاروباري شولې

وګورئ عالمه پاکې نجونه مکتبي شولې

لاړې بازاري شوې ، د ناوليو دياري شولې

ما پسې لښکر شئ ، که د شرم ختميده غواړئ 

نورله مانه څه غواړئ ؟

ماته رأيه راکړئ ، تللې ښځې درستنې کمه

خلاصې يې له درس او له شورا او ادارې کمه 

بيا يې افغاني ، او مسلمانې پښتنې کمه 

کورکې يې چارميخ کم او په شرع يې درنې کړمه

ما باندې آمين کړئ که د ښځو رغيده غواړئ

نور له مانه څه غواړئ ؟

ولي خبر نه ياست چې څه کيږي زه پکې يمه 

هر مکتب چې سوځي يا لوتيږي زه پکې يمه 

ګرده کارکوونکې چې قتليږي زه پکې يمه

چيری چه فتنه راپورته کيږي زه پکې يمه

تاسي که رښتيا د حسامه په لاره تله غواړئ

نور له ما نه څه غواړئ ؟

 

زه يم چه زابل او ارزګان مې دړې وړې کړ

زه يم چه جومات د کندهار مې شنې لوخړې کړ

زه يم چه زرغون جلال آباد مې د اور لړې کړ

سپين ملا مې ګونګ کړ ، تورملا مې دبړبړې کړ

دغه زما لار ده ، که زما په پلو تله غواړئ 

نور له مانه څه غواړئ ؟

 

زه يو کلينر وم په جنګونو کې رهبر شومه

بيا د بې هدفه لنډ غرو سرلشکر شومه

ورو ورو په جهاد کې د ډالرو مليونر شومه

هم پروفيسر ، هم بې سنده انجينر شومه

پنډ شئ زما شاته که په دې راز پوهيده غواړئ

نور له مانه څه غواړئ ؟

 

اې تر ايمان ګرانو هيروئينو درنه جارشمه

زه در ته لوګی شمه ،قربان شمه ،بخار شمه

دادی زه کانديد يمه چې بيا دې خدمتګار شمه

ستاسي سوداګر شم ، قاچاقبر شم ، ټيکه دار شمه

تاسي به ګلرنګو پاريسيو ته ورتله غواړئ

نور له مانه څه غواړئ ؟

                                                        ل " مين "

 

 

 


April 16th, 2006


  برداشت و بازنویسی درونمایه این تارنما در جاهای دیگر آزاد است. خواهشمندم، خاستگاه را یادآوری نمایید.
 
بازگشت
شعر،ادب و عرفان